ဝမ့်ဟိုင်းဌာနချုပ် စီးနင်းသိမ်းပိုက်နိုင်ရန် ဓာတုလက်နက်သုံးသင့်လည်း သုံးရမည်ဟု နေပြည်တော်စစ်ရုံးချုပ်ညွှန်ကြား
SSPP/SSA တပ်သားများ
ထိုးစစ်ဆင် တိုက်ခိုက် လာသည့် မြန်မာစစ်တပ်အား ပျောက်ကျား နည်းဖြင့် ၃ လကြာ ခုခံတိုက်ခိုက် နေသော သျှမ်းပြည် တိုးတက်ရေးပါတီ/သျှမ်းပြည် တပ်မတော် (SSPP/SSA) ၏ ဝမ့်ဟိုင်းဌာနချုပ် အား စီးနင်း သိမ်းပိုက် နိုင်ရန် ဓာတုလက်နက် သုံးသင့်လျှင် သုံးရမည်ဟုနေပြည်တော် စစ်ရုံးချုပ်မှ ညွှန်ကြား ထားကြောင်း စစ်ရုံးချုပ် အတွင်းပိုင်း နှင့် ဝင်ဆန့်သည့် အသိုင်းအဝိုင်းက ပြောပါသည်။
“ဝမ့်ဟိုင်းဌာနချုပ် ဒါမှမဟုတ် စဝ်ပန်ဖှရဲ့ဌာနချုပ်ကို သိမ်းပိုက်နိုင်ဖို့ ဓာတုလက်နက်သုံးသင့်ရင်လဲ သုံးရမယ် လို့ ညွှန်ကြားထားတယ်။”
အလားတူ SSPP/SSA ၏ ဝမ့်ဟိုင်း ဌာနချုပ်ကို မဖြစ်မနေ စီးနင်း သိမ်းပိုက်နိုင်ရမည်ဟု လားရှိုးအခြေစိုက် အရှေ့မြောက်ပိုင်းတိုင်း စစ်ဌာနချုပ်ရုံးမှ အမိန့်ချကြောင်း ရမခတိုင်းရုံးနှင့် နီးစပ်သူတစ်ဦးက ပြောပါသည်။
သျှမ်းပြည် မြောက်ပိုင်း တန့်ယန်းမြို့နယ် မိုင်းကောင်ကျေးရွာအုပ်စု တောင်ဘက် SSPP/SSA ၏ အဓိက မဟာဗျူဟာမြောက် လွယ်ဂျန့်ကင့် ၇ မိုင် တပ်စခန်းကို ဂျွန်လ ၃ ရက်နေ့ မြန်မာစစ်တပ် တိုက်ခိုက်ခဲ့စဉ် ကလည်း မြန်မာစစ်တပ်မှ ဓာတုလက်နက် အသုံးပြု ခဲ့ကြောင်း တပ်မဟာ ၃၆ မှ တပ်မှူးတစ်ဦးက အထောက်အထားပြဆို ပြောကြားခဲ့သည်။
တဖက်၌လည်း မြန်မာစစ်တပ်က ဝမ့်ဟိုင်းဌာနချုပ် အနီးသို့ စစ်အင်အားများ ပို့ဆောင် ဖြည့်တင်းလျက်ရှိ သည်။
“၂၀ ရက် မနေ့က တောင်ကြီးကနေ စစ်ကားအစီး ၅၀ လဲချားကို မနက် ၈ နာရီ ရောက်လာတယ်။ ဒေသခံ တွေရဲ့ ကားတွေတောင် ချောဆွဲထားသေးတယ်။ ဝမ့်ဟိုင်း ဘက်ကို တက်ဖို့ပေါ့” ဟု လဲချား ဒေသခံတစ်ဦးက ပြောပါသည်။
မိုင်းရယ် ဖက်မှလည်း ဂျွန် ၁၈ ရက်နေ့၌ ဝမ့်ဟိုင်း ဌာနချုပ်ဘက်သို့ ဆင်းလာကြောင်း SSPP/SSA မှ တပ်မှူး တစ်ဦးက ဆို၏။
ဂျွန် ၁၄ ရက် သျှမ်းပြည် တိုင်းချုပ် ဒုဗိုလ်ချုပ်ကြီး အောင်သန်းထွဋ် လားရှိုးသို့ ရောက်ရှိစဉ် တပ်မ ၃၃ လည်း တရုတ်ဖြစ် FAW ၆ ဘီး စစ်ကား ၁၆ စီး ရမခ တိုင်းရုံးသို့ ရောက်ရှိကြောင်း လားရှိုး ကုန်သည် တစ်ဦးက လည်း ပြောပါသည်။
ထွက်ပေါက် တစ်ပေါက် တည်းသာ ပေးထားသည့် ပုံစံဖြင့် SSPP/SSA ဌာနချုပ် ဝမ့်ဟိုင်းအား မြန်မာစစ်တပ် က သုံးဖက် သုံးတန်မှ အင်အားဖြည့် ဝိုင်းရံ ပိတ်ဆို့ ထားသည်ဟုလည်း သျှမ်းပြည် ပြန်လည် ထူထောင်ရေး ကောင်စီ/သျှမ်းပြည် တပ်မတော်(RCSS/SSA) ခေါင်းဆောင် စဝ်ယွတ်စစ် က ပြောဆို၏။
သတင်းရင်းမြစ် - သျှမ်းသံတော်ဆင့်
No comments:
Post a Comment